Le Direct

Candidature de François Tatti : la réaction d'Alex Alessandrini

(A redazzioni d'Alta Frequenza) - Ind'un cumunicatu, u presidenti di u Partitu Radicali di Manca di Corsica Suprana, Alex Alessandrini, hà riagitu à a candidatura di François Tatti à l'investitura di u partitu pà i municipalidi u 2014 in Bastia. Quissu quì vedi iss'attu quì com'è u fattu di rinunzià à l'idea di una primaria citadina di manca in Bastia, postu chì à parè soiu, François Tatti "ùn pinsendu più oramai à a nuzioni di primaria, si piazza oramai ind'una dimarchja demucratica drentu à u PRG." Alex Alessandrini compii dicendu "ch'ellu rispittarà à mumentu datu qualsiasi dicisioni". U presidenti di u PRG di Corsica Suprana rammenta chì "u PRG hà aduttatu una muzioni à l'unanimità chjamendu à l'unioni di i forzi di manca [...] è hà dicisu di pighjà l'iniziativa di scuntrà ind'i settimani à veni [i so] partenarii". Infini, ind'un paragonu assai attuali, Alex Alessandrini incalca nant'à u fattu chì "à l'arringuerciu di ciò chì si passa in Roma, duva i cardinali s'aduniscini in cunclavu pà sceghja un successori à u papa chì si ni và, l'affari ùn hè micca listessu à u PRG pà ciò chì tocca à a situazioni in Bastia. U merri ùn hè micca demissiunariu è u postu ùn hè dunqua micca biotu. S'ellu duvia essa cusì, un ghjornu o l'altru, l'Assemblea ghjinirali di u nostru partitu prupunaria, ellu stessu, un successori à i bastiacci".