Blessés par balles d'Ajaccio: début de l'enquête
(A redazzioni d'Alta Frequenza) - Trè omi sò stati feriti da balli arisera in u centru d'Aiacciu (ghjovi). Versu setti ori è mezu à pocu pressu, un omu nant'à una motò hà tiratu nant'à i trè vittimi chì erani ind'u stabulimentu di unu di i ferti nant'à a piazza Foch, ghjustu in faccia à a merria d'Aiacciu. Frédéric Salini, u rispunsevuli di u risturanti sushi è u so servori Kevin Carta sò stati tocchi, à i ghjambi è in pettu. Una terza parsona, chì saria statu un clienti, hè statu toccu à i ghjinochji. Unu di i trè feriti s'hè piattatu ind'un carrughju vicinu pà pruvà à scappà. U cunduttori di a motò è u tiradori sò spariti à lestra. Una motò in focu hè stata ritrova calchì ora dopu ind'u golfu di Lava. Pudaria essa quilla utilizata. Dopu, i succorsi i è servizii di pulizza sò intarvinuti. I feriti sò stati medicalizati sopralocu prima d'essa traspurtati à l'uspidali d'Aiacciu. Un'arma saria stata ritrova nant'à a piazza Foch pà ciò chì tocca à l'inchiesta. Ss'ultima hè cunfidata à a pulizza ghjudiziaria.
Sur le même sujet
