Attention à la grippe et à la gastro-entérite en Corse
(A redazzioni d'Alta Frequenza) - Attenti à a grippa è à a gastroenterite in Corsica. Sicondu a reta di survighjenza Sentinelles, u nivellu d'epidemia di grippa hè statu francatu a sittimana scorsa in Francia è par asempiu in Corsica, chì hè oghji a regioni di Francia a più tocca da u fenomenu cù l'Auvergne è u Limousin. "L'intensità di l'elementi grippali duvaria cuntinuà à crescia sta sittimana è cunfirmà di fattu u principiu di l'epidemia", dici a reta. A sittimana scorsa, 331 casi di grippa pà 100 000 abitanti sò stati custatati in cunsultazioni di medicina generali in Corsica. U nordu di l'isula hè particularmenti toccu da l'epidemia, è soprattuttu i lochi di Bastia, u Capicorsu, u Nebbiu è a Balagna, mentri chì a parti suttana hè piuttostu scantata. Pà ciò chì tocca a gastroenterite, s'è à u cuntrariu di a grippa u nivellu d'epidemia ùn hè micca statu toccu, a reta Sentinelles faci sapè quantunqua ch'ella c'hè sempri "un'attività forti". In Corsica, i casi di diarria aguta visti in cunsultazioni di medicina generali a sittimana scorsa sò stati stimati à 248 casi pà 100 000 abitanti. Stavolta, hè u latu uccidintali è u centru di l'isula chì sò i più tocchi è soprattuttu a regioni aiaccina fin'è a Balagna è u Curtinesi. In regula generali, ss'epidemii di staghjoni sò nurmali è senza gravità. Ma ci poni essa cumplicazioni ind'è i parsoni i più debbuli com'è i criaturi è i parsoni anziani.
