Attentat de Bonifacio : les dernières précisions
(A redazzioni d'Alta Frequenza) - Dopu à l'attentatu chì hà toccu trè residenzi in Bunifaziu (veda altrò), à u locu dittu Balistra, i spinghjifochi sò andati sopralocu. Spinghjini un focu chì s'hè dichjaratu ind'una di i residenzi, dopu à a splusioni di una di i carichi. Sminadori è forzi di pulizza sò andati nant'à i lochi è ani missu in ballu un perimetru di securità, parmittendu à i suldati di u focu d'intarvena ind'un sicondu tempu. Nant'à l'attentatu stessu, turisti chì passavani vicinu à a pruprietà appartinendu à u banchieru Alain Lefèbvre sariani stati missi in securità da u commando, ghjuntu pà metta i carichi splusivi. Si sà dinò chì i parmissi di custruiscia liati à casi futuri nant'à issu pezzu di tarra sò stati assai cuntistati. D'appressu à l'aghjuntu à u merri di Bunifaziu, incaricatu di l'urbanisimu, s'è si pudia custruiscia nant'à a zona ind'u quadru di u PLU di u 2006, l'affari ùn era più listessu in u 2007 dopu à a cuntestazioni di u mondu assuciativu. In u 2010, a corti amministrativa di Marseghja cacciava issu pezzu di tarra. Da issu fattu, quissa quì era gistita d'appressu à a legi litturali. In u 2010, un cunflittu uppunia Alain Lefèbvre à a cumuna di Bunifaziu chì l'avia ricusatu u so parmissu di custruiscia. In fini, in u 2012, a stessa corti è u stessu ghjudici marsighjesu cunsidareghjani chì a cumuna t'avia a raghjoni di ùn dà micca parmissu, ma stimani quantunqua chì Alain Lefèbvre pudia rifurmulà un parmissu à nomi di l'eccezzioni di a legi litturali (paisolu novu è cuntinuità d'urbanisimu).
Sur le même sujet
