Assassinat d'Yvan Colonna : le directeur de la maison centrale d'Arles entendu par la commission des lois de l'Assemblée Nationale
Mentri dui ori, Marc Ollier, u dirittori lla prighjoni cintrali d’Arles, è Corinne Puglierini, quidda ch’era chivi innanzi ad iddu, sò stati intesi da a cumissioni di i legi di l’assemblea francesa, dopu à l’assassinatu d’Yvan Colonna da u gihadistu franck elong abé.
Jean-Félix Acquaviva hè di quiddi chì ani quistiunatu à Marc Ollier. U diputatu lla siconda circuscrizzioni llu Cismonti hà dumandatu i ghjustificazioni par ciò chì tocca à u intrattinimentu di i matiriala di videosurviglianza, chì si hè fattu mentri ch’iddu hè successu u straghju. Hà ancu postu quistioni da sapè parchì ùn ci n’era agenti da surviglià quiddu lucali.
Si hè quistiunatu dinò par ciò chì tocca à u currieri d’un prighjuneri corsu, impinsiritu bè da franck elong abé.
Infini, si hè dumandatu chì n’era d’issa diffarenza di trattamentu pinitinziariu trà franck elong abé è Yvan Colonna.
Steti lu à senta.
Marc Ollier hà dittu chì i cundizioni d’intrattinimentu erani nurmali chì, parvia di a surviglianza, l’affari ùn si pò fà chè di ghjornu. Hà ramintatu ch’iddu era impussibuli pà l’agenti incaricatu lla videosurviglianza di tena un ochji à tempu à tutti i camerà, è ch’in lu pianu privistu tandu, ùn c’intria a sala di i sport.
À senta lu, u soli prighjuneri accumpagnatu in cuntinivu in francia hè salah abdeslam. Tutti l’altri, ancu puri i DPS, ùn sò accumpagnati in cuntinivu, cacciatu u fattu d’essa à l’isulamentu.
Steti à senta à Marc Ollier
Michel Castellani, u diputatu lla prima circuscrizzioni llu Cismonti, si hè quistiunatu par sapè chì n’era d’issi supposti ghjastemi ch’iddu avaraia dittu Yvan Colonna.
A risposta di Marc Ollier, cumossu pinsendu à a viulenza di l’agrissioni, ùn li dà tanta autenticità, à issi ghjastemi. À senta lu, franck elong abé si n’hè presu à u prighjuneri u più famosu lla prighjoni cintrali par fà parlà d’iddu.
Steti à senta à Michel Castellani è à Marc Ollier.
