Arrêtés Miot : la mobilisation continue
(A redazzioni d'Alta Frequenza) - Arresti Miot è dicisioni di u cunsighju custituziunali : i riazzioni cuntinueghjani in Corsica. U Cunsighju di i Corsi di l'Auropa chjama à l'Assemblea di Corsica, ind'una lettara aparta. Chì eti da fà, dumanda quissa quì, pà impidiscia issa presa nant'à u patrimoniu, eredità di i nostri vechji à i so zitelli è morti pà a Francia, è què, di pettu à i dispusizioni di u statutu particulari di a Corsica? Chì eti da fà, mentri chì "d'altri rughjoni francesi t'ani à a so dispusizioni misuri chì ùn sò micca appiecati à i nostri cumpatriotti di Corsica, è què à u mutivu di l'egualità è di a ghjustizia?" cuntinueghja a lettara aparta. Riazzioni dinò di Joselyne Fazi Mattei, chì à nomi di l'associu di i merri di Corsica Suttana spera chì issa dicisioni ùn farà micca crescia un sintimu di spussessu patrimuniali, è què à u mumentu duva a Corsica cunnosci difficultà impurtanti in materia d'alloghji è d'urbanisimu. Si pò parlà d'egualità, dumanda a presidenti di l'associu, quandu si sà chì a maiò parti di a pupulazioni si pudaria ritruvà ind'a più grandi difficultà finanziaria, à u mumentu di duvè arrigulà a so successioni? Joselyne Fazi chjama à a mubilisazioni di tuttu ognunu, pà dì d'innò à a fini anticipata di issu dispusitivu dirugatoriu.
Sur le même sujet
