Affaires Pélican et aide au fourrage : du sursis et des amendes requis contre Paul Giacobbi, Thierry Gamba-Martini, et Francis Pian
Dipoi marti, Paul Giacobbi, l’anzianu prisidenti di l’esecutivu, Thierry Gamba-Martini, u so dirittori ginirali lli sirvizia, è Francis Pian, u dirittori di l’uffiziu lli trasporti di tandu, sò ghjudicati in Bastia.
Marcuri, u ministeru publicu, riprisintatu da Monique Pla, hà fattu cunnoscia i so richisizioni. Par contu soiu, si tratta d’arrubeghju di solda publichi in l’affari di u battellu « Pélican » di a Méridionale, è d’una prova in l’affari di l’aiuti à u furaghju.
Pà l’affari di u « Pélican », Monique Pla hà signalatu, com’è par quidd’altr’affari, un dispusitivu missu in piazza à a lestra da ingagià i solda publichi, via quattru mail mandati in 24 ori.
Pà l’aiuti à u trasportu di u furaghju, chì ufficialmenti ùn sò mai stati tocchi, dici Monique Pla chì « quandì Paul Giacobbi dumanda à Thierry Gamba-Martini di metta in anda un aiutu, a sà chì l’affari hè for’di legi ».
Contru à Paul Giacobbi, vistu di manera chjara com’è l’urdunatori d’issi spesi, sò stati dumandati un annu di prighjoni attimpati, 50 000€ d’amenda è cinqui anni d’ineligibilità à mutivu d’arrubeghju è prova d’arrubeghju di solda publichi, è presa illegali d’intaressi.
Contru à Thierry Gamba-Martini, sò stati dumandati ottu mesi di prighjoni attimpati è 10 000€ d’amenda. Contru à Francis Pian, sò stati dumandati sei mesa di prighjoni attimpati è 10 000 € d’amenda, pà i dui primi accusazioni mintuvati.
Infini, in l’affari di u « Pélican », 200 000€ d’amenda sò stati dumandati contru à a Méridionale, à mutivu di binifiziu d’arrubeghju di solda publichi.
Sur le même sujet
