Affaire Reims-Bastia : interdictions de stade et amendes pour les 7 supporters jugés
(A redazzioni d'Alta Frequenza) - Ssu vennari, u tribunali currizziunali di Reims hà fattu cunnoscia a so dicisioni inde l'affari Reims-Bastia, induva setti sustenidori di u SC Bastia erani accusati d'affrontu è di ribellioni contr'à i forzi di l'ordini in centru cità dopu a partita trà i dui clubs u 13 di farraghju scorsu. S'è u prucuratori di a Republica di Reims avia dumandatu trà unu è cinqui mesi di prighjoni attimpati contr'à i setti prutagunisti, sei sò stati cundannati à interdizzioni di stadiu di dui anni, tutti ani presu amendi trà 1 000 è 2000 auri pà ribellioni, affrontu, o i dui à tempu sicondu i casi, è à virsà trà 100 è 200 auri di danni è intaressi à i pulizzeri di Reims. Una sintenza chì ùn duvaria micca piacia à ssi sustenidori, chì aspittavani d'essa assolti, è chì dinunziani dipoi u principiu di l'affari viulenzi pulizzeri, cù una lagnanza posta è un'inchiesta aparta da l'IGPN di Metz. Una tesa chì saria accertata da maghjini di videò survighjenza, isciuti ssu ghjovi nant'à France 3 Corse Via Stella, è induva omu pò veda pulizzeri pighjassini à i sustenidori cù una vittura, mentri chì altri menani pugni, calci, o ancu colpi di buttiglia di gaz lacrimogeni contr'à i sustenidori prisenti.
