Le Direct

Affaire du veau jeté d'un pont en Corse : Jean-Dominique Orsoni condamné à dix mois de prison dont quatre fermes

Luni, era u prucessu di Jean-Dominique Orsoni. U vaccaghju niulincu di vint’anni avia lampatu un viteddu vivu da un ponti, d’aprili llu 2019.

L’omu dici ch’iddu carriaia l’animali in a so vittura dopu ad avè lu impattatu, è ch’idd’hà fattu cussì da accurtà a so suffrenza, chì u viteddu t’avia una zampa tronca.

Ma iss’argumenti, l’hà cuntrastati a pracura, chì hà fattu veda u ritrattu d’un tilifuninu, induva u ghjuvanottu tinia una ghjatta tumba à baddi è un fucili.

Un si sà ancu quali hè chì hà filmatu l’affari di u viteddu. Ma l’altra parsona prisenti hè ghjunta à tistimugnià. Hà dittu ch’idda s’avvargugnaia d’ùn avè pussutu parà issu « sfocu » di u so amicu di zitiddina, priziatu da tutti, à senta lu.
I partiti civili ani dumandatu rimpattu è cundanni in più, da ch’idd’ùn posca più l’omu avè animali.

In quantu à a prucuratrici Caroline Tharot, avia dumandatu 16 mesa di prighjoni cù 10 in pena ferma, è ch’iddu sichi missu subitu in prighjoni l’omu. Hà dumandatu dinò ch’iddu li sichi impiditu par 10 anni d’avè un animali.
Marc-Antoine Luca, l’avucatu llu ghjuvanottu, hà chersu calchì climenza, chì à senta lu, u ghjuvanottu tandu t’avia una pena d’amori.

Fatta fini, u tribunali hà datu 10 mesa di prighjoni cù quattru in pena ferma, è un mantinimentu in ditinzioni. U restu lla cundanna hè suspesu, cù una missa à u provu di dui anni, è un ublicazioni di trattà si.

L’hè stata difesa, à u ghjuvanottu, d’avè un animali par trè anni, è li tuccarà à pagà 6 000€ à i partiti civili.