Affaire du couple de retraités séquestré à Folelli : les précisions du procureur de la République
(A redazzioni d'Alta Frequenza) - Luni in fin di ghjurnata, u prucuratori di a Republica di Bastia, Nicolas Bessone, hà cumunicatu annant'à l'inchiesta cuncirnendu l'agressioni di un coppiu di ritirati di 65 anni in I Fulelli u 31 d'uttrovi scorsu, chì hè statu sarratu in casa prima d'essasi fattu arrubà parechji affari. L'inchiesta di i servizi di gendarmeria hà datu i so frutti in furia, postu chì trè omi, di vinti anni pà u capimachja, vintiquattru è diciassetti anni sò stati missi in asamini par arrubecciu è viulenzi cù armi in gruppu urganizatu, una malfatta chì li faci risicà trenta anni di prighjoni. Ci voli à dì chì i trè ghjuvanotti, chì ani ricunnisciutu una parti di i fatti, sariani stati assai viulenti postu chì l'omu di u coppiu hà avutu u nasu sciappatu è parechji altri feriti par via di i colpi minati da i malfattori, ciò chì hà inghjinnatu 15 ghjorni d'Incapacità Tempuraria Tutali. U leader suppostu di l'agressioni avia travaghjatu calchì sittimana fà com'è operaiu ind'a casa di ssu coppiu, avendu forsa apprufittatu cusì di i travaghji pà pudè usservà i lochi. U valori di ciò chì hè statu presu hè abbastanza altu, postu chì i malfattori ani arrubatu soldi, ghjuvelli maiò dinò a cullizzioni di franchizi di u coppiu ind'u quadru di un modu uparatoriu chì hè par avà assai scarsu in Corsica.
Steti à senta u prucuratori di a Republica di Bastia, Nicolas Bessone.
Sur le même sujet
