Le Direct

Accidents mortels de la circulation en Haute-Corse

(A redazzioni d'Alta Frequenza) - Dui accidenti gravi di a circulazioni in Corsica Suprana stamani in freccia (sabbatu). Versu 6 ori, à u nivellu di Canavaghja, RN 197 à a surtita di Ponte Leccia versu l'Isula, un veiculu à pesu maiò cù dui parsoni in drentu hè isciutu da a strada. U guida ùn hè micca statu toccu, inveci chì u passaghjeru, un omu di 27 anni, era in arrestu cardio vasculari quandu chì i succorsi sò intarvinuti sopralocu. Iss'ultimu hè mortu à a so ghjunta via ambulanza nant'à l'uspidali di Bastia. Da nutà chì u guida avaria scappatu dopu ind'a natura. Quissu quì hè ricircatu in issu mumentu da i gendarmi. Sicondu accidenti, appena dopu à 7 ori, RN 198 à l'isciuta di A Ghisunaccia versu Aleria, dui vitturi si sò inticciati. Drentu à u primu, quattru parsoni di una stessa famighja d'urighjini cuntinintali. A mamma, 33 anni, hà persu u fiatu, mentri chì u babbu, di a stessa età soffri di parechji feriti gravi. Iss'ultimu hè statu traspurtatu via elicotteru nant'à l'uspidali d'Aiacciu. I zitelli, una femina di 6 anni è un masciu di 4 anni, dinò feriti di modu gravi, sò stati trasferiti di modu rispittivu nant'à l'uspidali di Bastia Falcunaghja è nant'à quillu di a Miséricorde in Aiacciu. U ghjuvanottu di 20 anni, chì guidava u sicondu veiculu, ùn hè statu toccu. Hè intarrugatu in issu mumentu da i gendarmi di A Ghisunaccia.