Une bactérie qui ravage plusieurs espèces végétales en Italie menace de se propager
(A redazzioni d'Alta Frequenza) - Femu a Corsica lampa una chjama forti à u Statu pà ciò chì tocca u prublema di a sparghjera di un batteriu chì tocca è tomba parechji spezii vegetali in Italia suttana. A Xylella Fastidiosa, prisenti dipoi u 2013 ind'u rughjoni di a Puglia, sterpa par asempiu i vigni, l'alivi, i citrò, l'amanduli, i lecci o ancu a luzerna. Ssu batteriu si trasmetti soprattuttu grazia à insetti vettori è si diffuseghja in furia. Par avà, ùn asisti micca trattamentu fora di strappà è di distrughja i pianti cuntaminati, è un cuntrollu di i pupulazioni d'insetti chì u trasmettini. U risicu maiò di dissiminazioni hè a multiplicazioni, l'espurtazioni è u trasportu di i pianti vegetali cuntaminati. Pà Femu a Corsica, a Xylella Fastidiosa hè una minaccia diretta pà a Corsica, postu chì l'isula faci ghjunghja parechji pianti pà i prufiziunali o pà l'urnamentazioni, par asempiu da u meziornu di l'Italia è di a Spagna. Dopu à u scempiu inghjinnatu da u cynips annant'à i castagni corsi, u partitu naziunalistu manda un missaghju à u Statu, rispunsevuli di a prutezzioni di i vegetali di pettu à ssu risicu pussibuli maiò, prima ch'ellu sighi troppu tardi. Femu a Corsica pruponi d'altrondi un scontru luni chì veni in Corti trà agricultori, urticultori, furestieri è tutti i parsoni intarissati pà pudè dibatta è ricircà mezi d'azzioni pussibuli.
Steti à senta à Saveriu Luciani, cunsighjeru tarrituriali Femu a Corsica.
