Procès en appel de l'affaire des gîtes ruraux : Jacques Costa souligne le rôle capital du cabinet de Paul Giacobbi
(A redazzioni d'Alta Frequenza) - Ssu marti dopu meziornu, hè tona un elettu di l'epica, Jacques Costa, assoltu duranti u prima prucessu, chì hè statu intesu da a Corti d'Appellu di Bastia pà u prucessu in appellu di l'affari di l'alloghji campagnoli. Quissu quì, presidenti di a cumissioni di u mondu rurali di u Cunsighju generali à l'epica di i fatti, hà dittu torna ch'ellu hè u cabinettu di u presidenti di u Cunsighju Generali, Paul Giacobbi, chì pighjava i dicisioni cuncirnendu u cartulari di l'alloghji campagnoli, citendu di nomi di Dominique Domarchi è d'Augustin Viola. Jacques Costa chì hà ramintau ch'ellu hè partutu da a seenza di u 16 d'aprili di u 2009 dopu avè vistu chì suvvenzioni à associ erani stati sminuiti trà u passaghju ind'a so cumissioni è u votu in seenza publica. Quissu quì hà ripresu pà contu soiu a sprissioni aduprata da a presidenti di a corti, Véronique Maugendre, chì hà amintatu un cabinettu senza ritinuta. Cuncirnendu u cartulari postu da un'amica di u so fratellu è vutatu da u cunsighju generali, hà dichjaratu ch'ellu ùn hè mai statu à capu di ssa dumanda, è ch'ellu ùn l'hà micca posta. À a dumanda di l'avucatu di l'associu ANTICOR, maestru Jérôme Karsenti, dumandenduli s'è a situazioni era quilla "di un'amministrazioni è d'eletti chì ùn facini nulla, è d'un cabinettu chì faci tuttu", Jacques Costa hà rispostu ch'ellu hè u cabinettu "chì [dava] ordini in tutti i casi". Un cabinettu onniputenti chì privava l'eletti di qualsiasi puteri, d'appressu à Jacques Costa.
Steti à senta à Jacques Costa.
