Le Direct

Parighji nega u carattaru puliticu di u cartulari corsu, chjama à una mubilisazioni pupulari maiò

(J.Pernici & M.Andreani - Alta Frequenza) - Ùn c'hè micca più cioncu cà quillu chì ùn voli senta. Eccu a cunclusioni à l'ingrossu di u presidenti di l'Esecutivu, Gilles Simeoni, dopu à dui ghjurnati parighjini chì ùn ani fattu avanzà mancu appena u cartulari corsu. Quistioni pulitica pà a maghjurità tarrituriali, quistioni tennica pà u prima ministru, Edouard Philippe, o ancu à i cunfini di l'assurdu pà u presidenti di u Senatu, Gérard Larcher, a littura hè cusì sfarenti chì oghji a capiscitura hè soca impussibuli pà a maghjurità tarrituriali. L'ora ùn hè più quilla di u dialogu è di u neguziatu, ma à u raportu di forza pà quilli chì difendini a nicissità d'incalcà d'una manera assai chjara nant'à a particularità di a Corsica nentru à l'insemi francesi. È calchì ghjornu nanzi à a visita d'Emmanuel Macron in Corsica, u 6 di farraghju, Gilles Simeoni hè statu chjarissimu : u presidenti di a Republica, è ellu solu, t'hà oramai i chjavi pà sbluccà a situazioni. À u nivellu isulanu, oghji, l'unica suluzioni pà fassi senta da l'arechja di "Jupiter" hè a mubilisazioni pupulari, d'appressu à Gilles Simeoni è Ghjuvan Guidu Talamoni.

Steti à senta à Ghjuvan Guidu Talamoni, u presidenti di l'Assemblea di Corsica.