Municipali 2020 in Bastia : Jean Zuccarelli lancia dighjà a so campagna
(Julien Pernici - Alta Frequenza) - Quandu si parti da luntanu, hè megliu à essa in avanzu. Eccu com’ellu si pudaria riassuma guasgi u principiu di campagna primaticciu di Jean Zuccarelli pà i municipali di u 2020 in Bastia. Mentri l’assemblea generali di u so associu Des Actes Pour Bastia, hà annuziatu à a stampa a so brama di prisintassi pà ss’alizzioni nova è purtà un prughjettu chì si custruisci appena di più ogni ghjornu, da fà chì Bastia ritruvessi u so splindori. A gistioni di a cità da a squadra municipali attuali ùn hè mancu appena famosa, d’appressu à Jean Zuccarelli, chì ramenta chì nant’à i trenta millioni d’auri d’investimenti annunziati in dui anni sicondu u pianu pluriannuali d’investimentu prisintatu da a maghjurità attuali, sedeci millioni sò stati investiti pà daveru solu. L’arechji di u merri di Bastia, Pierre Savelli, avarani zifulatu, postu chì Jean Zuccarelli hà dinunziatu cù forza u clientelisimu putenti d’appressu à ellu ind’a municipalità, dicendu dinò chì l’anziana maghjurità ùn hè mai passata pà u clientelisimu. Una candidatura dichjarata mentri chì a manca republicana hà persu assai alittori in Bastia dipoi u 2014.
Steti à senta à Jean Zuccarelli, oramai candidatu à l’alizzioni municipali chì venini in Bastia.
Sur le même sujet
