Le Tour de France 2013 prendra son départ en Corse
(A redazzioni d'Alta Frequenza) - Ùn hè micca tutalmenti ufficiali, ma guasgi, u Ghjiru di Francia 2013 si farà in partenza di Corsica. Dopu à parechji anni di neguziazioni, hè dunqua divintatu una rialità. U prughjettu, purtatu da u ghjurnalistu corsu Pierre Cangioni, hè statu resu pussibuli da l'impegnu di i cullettività isulani, frà altru a Cullettività Tarrituriali di Corsica, cù 2 millioni d'auri. Un investimentu impurtanti chì duvaria avè un impattu ecunomicu forti nant'à a nostra isula. U Ghjiru di Francia faci parti in fatti di i manifestazioni spurtivi i più cunnisciuti ind'u mondu. A prova spurtiva hè ritrasmessa inde più di 170 paesi ind'u mondu, in direttu. In Francia, certi tappi sò ancu suvitati da più di ottu millioni di telespettatori. U Ghjiru di Francia 2013 sarà dunqua u 100imu di a storia, è u primu à passà pà a Corsica. Tuttu què sarà ufficializatu u 6 di dicembri à a Cullettività Tarrituriali di Corsica chì prisintarà dunqua ufficialmenti u prughjettu.
