Le statut de co-officialité de la langue corse adopté !
(A redazzioni d'Alta Frequenza) - Eccu, hè fatta ! Dopu à un dibattitu longu com'è u mesi di maghju chì hà principiatu arimani (ghjovi), è l'asamini di 112 amendamenti, u statutu pà a cuufficialità di a lingua corsa hè statu aduttatu stasera da l'Assemblea di Corsica. Nant'à i 51 eletti di l'emiciculu, 36 sò andati à prò di u ducumentu, 11 ùn ani micca participatu à u votu (u gruppu la Gauche Républicaine è quillu di a diritta fora di Marie Antoinette Santoni Brunelli) è 4 erani assenti. È ancu s'ellu hè statu mudificatu di pettu à i numarosi amendamenti posti, u testu validatu stasera ferma assai vicinu finalmenti di quillu prisintatu prima da u cunsighjeru esecutivu Petru Ghionga, incaricatu di issu cartulari. U ghjornu hè bè storicu pà a Corsica, chì vedi a so lingua d'urighjini ricunnisciuta à paru cù u francesi inde l'isula, parmittendu li d'investiscia à l'avvena l'insemi di i spazii di sprissioni, via a missa in ballu di dispusitivi sfarenti, ghjuridichi frà altru. Ferma à sapè oramai s'è issu segnu forti lampatu da l'eletti di a CTC sarà bè ricivutu da Parighji, è s'è, da fà chì issu statutu divintessi effettivu, una mudificazioni di a Custituzioni sarà ingaghjata ind'u futuru.
Sur le même sujet
