Langue Vivante 2 Corse au collège : la polémique
(A redazzioni d'Alta Frequenza) - Pulemica dopu a publicazioni nant'à i reti suciali d'una fiscia di dialogu pà l'urientazioni à a fini di a scola di 6esima diffusata à i parenti d'elevi d'un culleghju bastiacciu mentri a simana nant'à a scelta d'una siconda lingua viva. L'alimanu, u talianu è u spagnolu sò pruposti à i sculari. Ma ritruvemi una minzioni in più : "pudeti sceglia dinò u corsu com'è lingua viva, ma l'elevi sò aduniti cù quilli di l'uzzioni "lingua è cultura corsa". Ssa scelta ùn hè micca cunsigliata in u scopu di studii universitarii induv'ellu ci voli ad avè di manera generali dui lingui stragneri". In un cumunicatu, u rettori d'accademia parla di "un'infrasata rincriscevuli". "Si tratta d'un veru sbagliu d'apprizzazioni o di furmulazioni", cuntinueghja Philippe Lacombe. "Dopu avenni presu cunniscenza, u Rettori hà dumanda una currizzioni subbitu chì hè stata fatta", hà dittu dinò ss'ultimu. Pà contu soiu, u presidenti di l'Asssemblea di Corsica Ghjuvan Guidu Talamoni dinunzia una cumunicazioni chì "và contr'à tutti i dichjarazioni internaziunali à prò di i lingui è di l'educazioni. Hè à contrasensu di tutti i deliberazioni di l'Assemblea di Corsica, di a pulitica linguistica è di a pulitica educativa ch'è no vulemu pà i ghjovani di u nostru paesi. Ùn pò essa intarpritata com'è essendu solu un attu isulatu d'un principali chì ùn tinaria micca contu di i nostri principii è di tutti i nostri urientazioni", si pò leghja in ssu cumunicatu. "M'aghju da ghjirà versu u Ministru di l'Educazioni Naziunali par amintà ssu prublema criatu da ssa cumunicazioni è l'emuzioni chì hè stata inghjinnata, è parlalli di manera più larga di u prublema di l'educazioni in Corsica, di u statutu di a nostra lingua, di l'affettazioni di i ghjovani certificati nant'à l'isula è di a criazioni di un quadru nurmativu specificu pà a Corsica", compii Ghjuvan Guidu Talamoni.
Sur le même sujet
