La première réaction de Gilles Simeoni après son élection à Bastia

(A redazzioni d'Alta Frequenza) - U Diu Vi Salvi Regina, cantu di a vittoria arisera pà i simpatizanti di Gilles Simeoni chì l’ani cantatu ind’u scagnu cintralizatori di a merria di Bastia. In fatti, l’unioni trà Gilles Simeoni, naziunalistu muderatu, François Tatti, candidatu di manca chì facia parti prima di l’ultima municipalità, è l’UMP-UDI Jean Louis Milani ani fattu cascà ciò chì certi pinsavani ch’ella era una citadella impussibuli à tuccà. Pà a prima volta dipoi u 1968, u merri di Bastia ùn avarà micca a casata Zuccarelli, scopu chì paria essa di primura pà parechji simpatizanti di a lista d’unioni. Ssa vittoria s’hè fatta in prupurzioni chì ani surpresu più cà un usservatori. Ci voli à dì chì cù 55,4% di i voti pà Gilles Simeoni contr’à 44,6% pà Jean Zuccarelli, cù 81,78% di participazioni contr’à 79,28% à u primu ghjiru, a vittoria di ssa manera hè guasgi una surpresa, postu chì l’unioni larga lacava pinsà chì certi alittori di Gilles Simeoni, François Tatti o Jean Louis Milani ùn pudariani micca andà à vutà o tandu ghjirà si ver di Jean Zuccarelli. A perdita di voti sarà stata minima infini, parchì cù 9431 voti, a lista d’unioni adunisci 181 voti di menu di pettu à u primu ghjiru quandu i trè listi erini spiccati, è vinci vintitrè scagni annant’à vintisei, i trè vinti da Jean Zuccarelli essendu i quartieri à u meziornu di a cità. Un scartu chì hè dinò una surpresa parchì Jean Zuccarelli, cù 7592 voti, hà adunitu 2082 voti di più di pettu à u primu ghjiru. A vulintà di cambiamentu sarà stata troppu forti pà Bastia chì scrivi a storia di a Corsica essendu a prima cità maiò di Corsica à eleghja un merri naziunalistu, ancu puru s’ellu hè accumpagnatu da a manca è a diritta republicana, un puntu pessimu essendu sempri quì pà certi par via di l’assenza di Corsica Libera inde ss’accordu chì hà parmissu à a lista Bastia di buscà si trentaquattru sedii à a merria di Bastia è sedeci à a Cumunità d’Agglumerazioni di Bastia, contr’à novi sedii municipali pà a lista di Jean Zuccarelli è quattru à a Cumunità d’Agglumerazioni.

Steti à senta a prima riazzioni di Gilles Simeoni, dopu à ssa vittoria.