L'impositu GEMAPI, un casticu pà l'intercumunalità
(Julien Pernici - Alta Frequenza) - Dipoi u 1a di ghjinnaghju, sò i cullittività lucali chì ani ripresu a gistioni di u risicu inundazioni, postu chì u Statu ùn hè più in carica di ssu prublema eppuru impurtantissimu. Una carica nova, vali à dì finanziamenti novi à truvà in un duminiu chì dumanda assai investimenti. È par ùn annigassi in ssi storii d'acqua, i cullittività lucali duvarani crià un impositu novu, o tandu tralascià u prublema è cunfruntassi à risichi maiò. Duvarà essa dicisu nanzi à u 15 di farraghju par essa bughjettizatu in u 2018. L'impositu GEMAPI, chì sarà liatu o à u futuru anzianu impositu d'abitazioni, o à l'impositi nant'à u fundariu o l'intrapresi, sarà limitatu à quaranta auri pà coppiu. Una perspettiva chì ùn rallegra mancu appena a Cumunità d'Agglumerazioni di Bastia è i cumunità di cumuni vicini, micca à prò d'un impositu novu, ma chì sarani ubligati à falla. Ind'è a CAB, sarà dicisu u 31 di ghjinnaghju in cunsighju cumunitariu, mentri chì l'ipotesi di un impositu di deci auri com'è quilla di u doppiu sò stati ricusati in scagnu.
Steti à senta à Michel Rossi, vici presidenti di a CAB in carica di ssu cartulari.
Sur le même sujet
