Football (National) - Le CA Bastia étrille Marseille-Consolat (4-0)
(A redazzioni d'Alta Frequenza) - Pà a 4ima ghjurnata di Naziunali, u CA Bastia s'hè rilanciatu propiu bè dopu a so disfatta in Colmar a sittimana scorsa battendu di manera faciuli a squadra di Marseille Consolat 4-0. Contr'à marsighjesi assai debbuli, i cabisti ani scrittu a prima rialisazioni prestu, à a 9ima minuta : annant'à un centru di Toudic, Ripart hà ripresu com'ellu ci vulia u ballò pà pudè batta u guardianu marsighjesi. I cabisti, chì ùn sò tantu stati minacciati da una squadra di Consolat muta, ani duppiatu l'affari annant'à un lob di 40 metri di Ripart à a 38ima minuta, l'attaccanti impristatu da Nîmes palisendu d'altrondi ch'ellu ùn hà micca fattu apposta. Fora di un picculu mumentu di scuncentrazioni di calchì minuta dopu à a pausa, i bastiacci ani gistitu bè a so avanza. È mentri ch'è no andavami versu un 2-0 tranquillu, Toudic hà scrittu un duppiettu in dui minuti à a 78ima è à l'80ima cù u listessu schema, tiri da luntanu cù errori tamanti di u guardianu visitori. Cù setti punti, u CAB ricolla à u cinquesimu postu.
Steti à senta a riazzioni di l'intrenori cabistu, Stéphane Rossi.
