Football - En amical, l'AC Ajaccio bat le CA Bastia (2-1)
(A redazzioni d'Alta Frequenza) - I clubs corsi di ballò prufiziunali compiini a so priparazioni à calchì ghjornu di a ripresa di i sfarenti campiunati. Ssu vennari, l'AC Aiacciu, squadra Liga 2 è u CA Bastia, furmazioni di Naziunali, ani ghjucatu l'unu contr'à l'altru à u stadiu François Coty. Un scontru amichevuli chì hè statu guadantu da l'ACA, dui rialisazioni à una. Sò i bastiacci chì ani scrittu a prima à a 3za minuta grazia à Bourgeois. I cabisti, chì ani sviluppatu un ghjocu assai intarissanti, ani fattu strazià aiaccini micca abbastanza aggressivi inde l'ingaghjamentu. Ci sarà vulsutu à aspittà a 55a minuta pà veda riagiscia i ghjucadori di Christian Bracconi, cù l'egualisazioni di Fauvergue. Cinqui minuti dopu, i bianchi è rossi ani fattu trimà i reti di u CAB cù Oliech. Un'ultima prova bona pà i dui squadri chì avarà parmissu à i dui intrenori di fassi un'idea appena più pricisa di a qualità di u so effettivu à l'alba di una staghjoni nova. Pà contu soiu, u SC Bastia, chì compii u so staziu in Savoia, hà fattu un risultatu à paru contr'à a furmazioni inglesi di Norwich City (1-1). A rialisazioni bastiaccia hè stata scritta da Kamano. Infini u GFC Aiacciu hà persu contr'à Livornu in San Remo, in Italia, 2-0.
Steti à senta l'intrenori aiaccinu Christian Bracconi, chì volta di manera più particulari annant'à u staziu in Anglet è chì pensa dighjà à a ripresa di a Liga 2 vennari chì veni.
Sur le même sujet
