Enquête sur la diversité culturelle : les précisions de Jean-Guy Talamoni
(A redazzioni d'Alta Frequenza) - Dopu a pulemica nant’à u prughjettu di quistiunariu missu in ballu da l’Università nant’à a gistioni di a diversità culturali, u presidenti di l’Assemblea di Corsica voli dà pricisioni. « C’hè parsu nicissariu di pruvà à trattà u prublema, inveci di nigallu è di piattacci, una pratica chì si ritrova troppu suventi cuncirnendu parechji puliticanti à i rispunsabilità », faci sapè Ghjuvan Guidu Talamoni. « C’hè parsu chì a prima tappa era di fà un censu, ciò chì ci hà purtatu à dumandà à l’Università di rializà un’inchiesta. Ss’inchiesta hè stata cunfidata à l’urganisimu chì ci vulia di pettu à a quistioni educativa, vali à dì l’ESPE « Scola Superiori di u Prufissuratu è di l’Educazioni). Ssa squadra di circadori hà missu in ballu un protocollu scentificu, chì hè statu validatu in furia da u Retturatu d’accademia. Hè in ssu quadru quì chì un prughjettu di quistiunariu hè statu adirizzatu, micca à l’elevi ma à i rispunsevuli di stabilimenti. Ben intesu, i quistiunari sò anonimi è in leia cù i prescrizzioni di a CNIL », cuntinueghja u presidenti di l’Assemblea di Corsica. « S’è u Rettori d’accademia duvia vultà nant’à a so validazioni in furia è scritta, valaria à dì chì ùn si pò micca travaghjà in Corsica nant’à certi sughjetti chì i circadori di fora trattani dipoi anni è anni. Spergu chì u dialogu privistu da quì à calchì ora trà l’Università è u Retturatu parmittarà di truvà un accunsentu. Di pettu à l’impurtanza di u prublema, l’inghjochi di pulitichella parini abbastanza derisorii. Spergu dinò cù sincerità ch’ella vinciarà in furia a raghjoni in menti à tutti », compii Ghjuvan Guidu Talamoni.
Sur le même sujet
