Corsica Libera veut une tolérance zéro contre les islamistes radicaux
Corsica Libera veut une tolérance zéro contre les islamistes
(A redazzioni d'Alta Frequenza) - Corsica Libera hà cumunicatu dopu à l'attentati chì ani toccu à Parighji vennari. Una presa di parolla pà dì chì a Corsica devi avè u so distinu in manu contr'à un Statu Islamicu chì s'assumiglia, à certi nivelli, à u regimi missu in ballu da Adolf Hitler quand'ellu hè ghjuntu à u puteri in Alimagna sicondu u partitu. S'è u partitu si voli francà di tutta stimmatisazioni di i musulmani chì campani in Corsica, dici quantunqua i cosi di una manera franca è chjara : ci sò integristi è lochi di radicalisazioni in Corsica, ma dinò a ghjunta di u salafisimu. È pà Corsica Libera, a suluzioni passa pà una gistioni più diretta da l'eletti corsi di ssu prublema. Corsica Libera pruponi a missa in ballu di un usservatoriu di i rilighjoni, parmittendu à l'eletti di tutti i gruppi di discorra cù i rispunsevuli rilighjosi di l'isula è di racoglia l'infurmazioni chì ricullariani, par asempiu in casu di radicalisazioni pà metta l'autorità francesi davanti i so rispunsabilità. Un usservatoriu aspittendu, dinò è soprattuttu, un trasferimentu di cumpetenza in ssu duminiu.
Steti à senta à Ghjuvan Guidu Talamoni, chì volta dinò annant'à a cullata pussibuli di u Front National dopu à ss'attentati.
