Assemblea di Corsica : un rollu più impurtanti pà a Cumissioni Pirmanenti ?
(Michaël Andreani - Alta Frequenza) - A prima riunioni di a Cumissioni Pirmanenti di l'Assemblea di Corsica d'una mandatura nova ùn avarà guasgi mai fattu nascia un intaressu cusì forti pà i ghjurnalisti corsi. Era u casu ssu luni à sera è i patroni di a Cullittività di Corsica nova ani sceltu d'una manera simbolica a sala di i deliberazioni di u Palazzu Lantivy, induv'ellu era adunitu torna un mesi fà l'anzianu Cunsighju Dipartimintali di Corsica Suttana, pà fà ssa riunioni. Era l'uccasioni d'asaminà, com'è sempri, i raporti scritti in u prugramma di a seenza di l'Assemblea di Corsica, urganizata ssu marti. Una Cumissioni Pirmanenti chì t'hà pà presidenti, a ramintemi, Ghjuvan Guidu Talamoni, cumposta di quatordeci membri raprisintativi di tutti i gruppi di l'assemblea, è chì pudaria avè un rollu più impurtanti duranti ssa mandatura. Si pudaria prununzià in fatti oramai di modu difinitivu nant'à raporti assai tennichi, chì ùn passariani più in seenza publica induv'elli sariani trattati cartulari più pulitichi.
Steti à senta à Ghjuvan Guidu Talamoni.
