Visite de Jean-Michel Baylet : Gilles Simeoni veut que l'Etat respecte la démocratie
(A redazzioni d'Alta Frequenza) - A visita in Corsica di u ministru di l'Accunciamentu di u Tarritoriu Jean Michel Baylet hè principiata ssu luni cù a signatura stamani di u protocollu d'accordu di a mudifica di u Cuntrattu di Pianu Statu Regioni 2015-2020. 10 millioni d'auri in più accumpagnani ssu ducumentu, finanziati à 50% da u Statu è à 50% da a CTC. Un protocollu chì privedi d'arricà migliurazioni cuncirnendu dui punti : a mubilità multimudali è un latu specificu nant'à a muntagna corsa. Una bella suddisfazioni pà Jean Michel Baylet, ancu s'è i discorsi di u presidenti di l'Assemblea di Corsica è di l'Esecutivu ùn dimustravani micca un'unanimità simuli. Di fattu nant'à a muntagna, a fiscalità o ancu nant'à u rispettu di i deliberazioni di l'Assemblea di Corsica, u ministru è l'eletti di l'isula ùn ani micca parlatu d'una voci sola. Pà Jean Michel Baylet, u Statu n'hà fattu largamenti è a cullittività unica futura n'hè a dimustrazioni a più evidenti. U presidenti di u Cunsighju Esecutivu hà rispostu largamenti à u ministru nant'à parechji punti : una mudifica nant'à u cuntrattu di pianu chì accumpagna tutti i regioni è micca solu a Corsica di manera specifica (chì ùn hè micca quilla sirvuta à u più à u nivellu finanziariu), nisun ricunniscenza di u statutu d'isula muntagna da u guvernu malgradu dumandi numarosi, vali à dì un Statu chì ùn stà micca à senta l'eletti di Corsica è i deliberazioni di l'Assemblea tarrituriali. Gilles Simeoni hà fattu u censu di tutti i cartulari senza risposta è hà pricisatu chì a so maghjurità hè stata scelta grazia à u suffraghju universali nant'à ssi cartulari quì è chì u fattu di rimetta in causa ss'affari faria chì u Statu vinaria à indebbuliscia a maghjurità tarrituriali, ma dinò tutta a demucrazia.
Steti à senta à Gilles Simeoni.
Sur le même sujet
