Un volcan sous-marin au large de Bastia ?
(A redazzioni d'Alta Frequenza) - L'infurmazioni hè stata cumunicata da a stampa taliana, Il Tirreno. A simana scorsa, piscadori taliani di l'isula d'Elba ani vistu accada un fenomenu particulari. Si sariani trovi in fatti duranti vinti minuti à u minimu davanti à un geyser di gaz è di cianga, in mari, di parechji decini di metri quadrati è d'una quindecina di metri d'altezza à u minimu. I piscadori ani alertatu tandu l'autorità è a zona hè difesa à a navigazioni. Una misura "par assicurà a securità a più alta di a navigazioni, aspittendu i cunniscenzi scentifichi nicissarii rializati", hà dichjaratu u capitanu Riccardo Cozzani. Ssu fenomenu hè accadutu à u largu di Bastia, vicinu à l'isula di Capraia. Sicondu Il Tirreno, scentifichi ani custatatu un'attività geufisica è rialzeghjani in ssu mumentu investigazioni magnettichi. L'elicotteru tennicu di l'Istitutu naziunali Geufisicu talianu hà bulatu sopra a zona marittima pà racoglia infurmazioni è pruvà à capiscia ssu fenomenu. Da rimarcà chì i piscadori ani signalatu incidenti simuli ss'ultimi anni, ma di un'impurtanza minimu. Sicondu u geulogu talianu Marco Morelli, si pudaria trattà d'un vucanu sottu marinu. I studii scentifichi a duvarani dimustrà.
