Trafic de drogue en Corse : sept personnes placées en garde à vue après une très importante saisie
Photo : Parquet d'Ajaccio
Marti è marcuri, a dirizzioni tarrituriali lla pulizza ghjudiziaria, a BRI è u GIR di Corsica ani coltu droga in quantità è ani intarpillatu setti parsoni in Aiacciu, Bastia è Portivechju, in lu quadru d’una inchiesta purtata da a pracura d’Aiacciu.
Via un cumunicatu, spieca u prucuratori lla ripublica d’Aiacciu com’iddi si sò passati l’affari.
U primu di frivaghju, un rinsignamentu presu da a BRI hà signalatu dui parsoni aghjà cunnisciuti da a ghjustizia, è suspittati di fà trafficu di droga è comprita di cumerci à fini di sbianchera di solda.
Hè stata dunqua missu in opara un travaddu longu di surviglianza pà issa prima inchiesta.
Sò stati rimarcati parichji và è volta trà i circondi aiaccini è a Vizzavona.
Una di i dui parsoni issendu un marinari, i inchiistadori ani pinsatu à a pussibilità d’un trafficu trà a francia è a Corsica, via i battelli.
I và è volta trà a Vizzavona è Aiacciu fendu si più friquenti, i inchiistadori ani dicisu u 15 d’austu di cuntrullà a ghjunta lla navi di Marseglia in Bastia.
Dui vitturi – trà i quali c’era quidda di u marinari – sò stati presi cù 70 chilò di canapu è un pocu di cucaina.
Via altri pirquisizioni, sò stati colti trenta chilò di canapu in più, cucaina è armi.
Ci n’hè par parichji miliona di marcansia.
Setti parsoni sò stati intarpillati è missi in guardia à vista in lu quadru d’issa inchiesta chì, à senta ni u prucuratori d’Aiacciu, hà pirimissu di fà cascà quattru punti di vendita in Aiacciu, in i quartieri di Petralba è di i Canni.
