Présentation du rapport relatif à la carte Ritirata ce jeudi à l'Assemblée de Corse
(A redazzioni d'Alta Frequenza) - Sissioni di l'Assemblea di Corsica dipoi ssu ghjovi è pà dui ghjorni, cù in u prugramma u raportu nant'à l'inserzioni prufiziunali di i prighjuneri pulitichi, ma dinò quillu di a camara regiunali di i conti di pettu à a situazioni finanziara di a cullittività lacata da l'anziana mandatura. Altru cartulari in dibattitu, quillu impurtantissimu nant'à a puvartà è a precarità nant'à l'isula. Mentri ssa sissioni, u prublema di i ritirati sarà amintatu dinò. In fatti, un raportu nant'à a criazioni d'una carta chjamata "Ritirata" attribuita à i ritirati chì stani in Corsica da i servizi di a CTC sarà prisintatu. Ramintemi chì pà pudella riceva, bisognu ad avè un nivellu di rivinuti massimu di 14 223 auri annuali, vali à dì à pocu pressu u SMIC. À mezu à l'altri misuri annunziati pocu fà da Ghjuvan Guidu Talamoni a ramintemi un'allarghera à i ligni suburbani di i camini di farru di a riduzzioni di 50% dighjà attribuita à i ligni maiò. Pà u trasportu aereu, 24 000 biglietti andata è ritornu à 95 auri inveci di 160 ani da essa pruposti da Air Corsica nant'à i traghjetti Corsica-Marseghja-Nizza. A Méridionale è Corsica Linea prupunarani pà contu soiu 6 000 biglietti andata è ritornu à 85 auri. L'associ di ritirati, fora di u STC è di a CFDT, chì aviani fattu cunnoscia u so disaccordu, battendu piuttostu à prò di l'ugualità inveci di l'equità, si sò mubilizati ssu ghjovi da mani davanti u purtonu di l'Assemblea di Corsica. In u so discorsu d'intruduzzioni, u presidenti di l'Assemblea di Corsica hà ramintatu chì ssu prublema hè priuritariu, annunziendu pà l'uccasioni u ricusu di u guvernu d'attribuiscia à i ritirati un'indennità cumpensatoria d'insularità, una rivindicazioni storica di ss'urganisazioni.
Steti à senta à Ghjuvan Guidu Talamoni, u presidenti di l'Assemblea di Corsica.
