Olympiades des Métiers : mettre en valeur la jeunesse corse qui a soif de réussite
(A redazzioni d'Alta Frequenza) - Hè ssu ghjovi ch'elli sò stati ricivuti in a Cullittività di Corsica à fiancu à urganisazioni prufiziunali è attori di a furmazioni i 68 candidati à a selezzioni corsa di ciò chì si chjama "Les Olympiades des Métiers" 2018, chì sarani urganizati u 29 è u 30 di marzu nant'à a piazza Miot in Aiacciu. Hè a cumpetizioni naziunali a più maiò inghjiru à a ghjuventù è a furmazioni prufiziunali. L'uccasioni pà ssi ghjuvanotti di 23 anni à u più è ghjunghjendu da i sfarenti sistemi di furmazioni di cunfruntrassi cù una quarantina di mistieri. Filiera vegetali, tennulugii novi, industria, automobili, alimentazioni, ustaria, sirvizi, mantinenza, custruzzioni, parechji settori sò raprisintati. I candidati selezziunati nant'à l'isula t'avarani a pussibilità di participà à i finali naziunali urganizati in Nurmandia à a fin di l'annu è, s'elli vincini, d'alzassi fin'è a cumpetizioni mundiali, sarà d'aostu di u 2019 in Russia. Pà a Cullittività di Corsica, si tratta di prumova più cà mai l'amparera è l'alternenza, i mistieri è a furmazioni prufiziunali, chì custituiscini i puntelli di a so pulitica di furmazioni. Una manera di dì dinò chì ssi filieri, sempri cunsidarati da certi com'è essendu senza avvena è di bassu nivellu, toccani oghji à l'eccelenza.
Steti à senta à Josepha Giacometti, cunsighjera esecutiva in carica di l'insignamentu sicundariu, di l'insignamentu superiori, di a ricerca è di a furmazioni prufiziunali.
