Olivier Pantaloni (ACA) : « Il faudrait peut-être changer d'air »
A voci curria chì sò uni pochi di sittimani in Aiacciu : sabbatu, finitu u scontru contru à Lens, Olivier Pantaloni hà dittu ch’idda c’era a pussibiltà d’una partenza, finita a staghjoni.
Rispundindu à a chistioni d’un ghjurnalistu, hà dittu l’addistradori aiaccinu ch’iddu era attenti à tuttu, ma micca parvia di a fini di staghjoni difficiuli : « mi fermani dui anni di cuntrattu, l’AC Aiacciu hè a me squadra, a me famidda, è ùn ci saria pinseri à cuntinuvà chivi. Ma à un certu mumentu, forsa ci voli à dì si ch’idda hè ora di cambià d’aria.
Ad oghji, dopu à issi parichji anni passati quì, semu cuddati dui volti. Quist’annu, emu vistu u pocu è micca ch’idda ci pudia prupona issa squadra in prima divisioni. Par casu chì una squadra mi pruponga una scumissa nova, li lintaria un ochji ».
Pudaria dunqua essa a fini d’un tempu, pà l’AC Aiacciu : Olivier Pantaloni ci hè statu ghjucadori è capitanu da u 1995 à u 2000, dirittori spurtivu cù Roland Courbis, addistradori aghjuntu, po’ addistradori principali à parta si da u 2009. Cacciata a staghjoni 2013-14 è u principiu di quidd’altra, si hè trovu à spissu à dirighja a squadra, cù una bedda riescita : quattru volti in i trè primi di siconda divisioni, dui cuddati in prima divisioni è un mantinimentu pà a staghjoni 2011-2012.
Cù a partenza d’Olivier pantaloni, si chjudaria una pagina impurtanti di a squadra di l’AC Aiacciu.
