Le drapeau corse interdit à l'Eurovision
(A redazzioni d'Alta Frequenza) - Ùn ci sarà micca bandera corsa à l'Eurovision ! In fatti, i parsoni chì t'ani un bighjettu pà u Cuncorsu Eurovision di a Canzona, urganizatu u 10, u 12 è u 14 di maghju in Stockholm in Svezia ani ricivutu un mail cù cunsigni siveri dati da l'Unioni Aurupea di Radiudiffusioni cuncirnendu i banderi accittati o micca in u Globen, a sala induv'ellu ci sarà u cuncorsu. S'è i banderi di i nazioni ricunnisciuti da i Nazioni Uniti sò accittati, com'è i banderi di l'Unioni Aurupea è a bandera arcubalenu di a cumunità lesbiana, gay, bisessuali è transgennaru, qualsiasi altra bandera hè pruibita. Un affari ineditu chì voli dì chì a bandera corsa ùn avarà micca u dirittu d'essa prisenti in u publicu, cù una visibilità di 200 millioni di telespettatori, l'evenimentu micca spurtivu u più suvitatu à a televisiò in u mondu sanu. Una dicisioni presa da fà chì u latu apuliticu di u cuncorsu sighi rispittatu sicondu l'UER. Da un'antra banda, a bandera corsa ùn hà micca avutu u privilegiu d'essa citata direttamenti, à u cuntrariu di a bandera di u Paesi Bascu, accantu à quillu di u Statu Islamicu, chì hè dunqua cunsidaratu di a listessa manera cà i banderi regiunali.
