La Corse pas (encore) touchée par l'épidémie de grippe
(A redazzioni d'Alta Frequenza) - Mentri chì l'epidemia di grippa hè sempri forti in cuntinenti, a Corsica ùn hè micca tocca par avà da u fenomenu. Inde certi regioni di Francia, com'è in Aquitaine o i Hauts de France, certi uspidali sò oramai belli pieni. Duranti l'ultima simana di u 2017, più di 12 000 parsoni sò andati ind'è l'urghjenzi pà una grippa o un sindromi grippali, è 1 250 parsoni sò stati uspitalizati. L'epidemia di grippa hè dunqua quist'annu d'un nivellu eccezziunali è u numaru di casi duvaria trapassà quillu d'annu. Sicondu a direzzioni generali di a Saluta, i ghjovani di menu di 15 anni sò par avà i più tocchi. A reta Sentinelle pà contu soiu, avanza u sciffru di 527 casi di sintumi grippali censati pà 100 000 abitanti à u nivellu naziunali, mentri chì in Corsica, à pocu pressu 150 casi solu sò censati pà 100 000 abitanti, vali à dì guasgi quattru volti di menu. Malgradu tuttu, emi sempri rimarcatu un tempu di ritardu d'una, dui, o ancu trè simani trà u cuntinenti è a Corsica l'anni passati. S'è a nostra isula hè par avà à un mumentu dittu pre epidemicu, u virus si duvaria sparghja da quì à calchì ghjornu. Ramintemi chì aldilà di u vaccinu, u mezu u più sicuru par ùn essa cuntaminatu, gesti simplici poni essa utuli dinò, com'è par asempiu u fattu di lavassi i mani d'una manera rigulari, ghjittà i mandili in a rumenzula è fà curi di vitamini.
