L'appel à la mobilisation du Collectif Patriotti, pour constituer une démarche de résistance patriotique
« Pinsemu ch’idda hè ora di riurganizà u muvimentu lla risistenza patriottica ».
U Cullittivu Patriotti, chì facia sabbatu in Aiacciu una cunfarenza di stampa, hà datu un appuntamentu à « tutti i corsi » u 15 d’uttrovi à l’università, par metta in anda una dimarchja unitaria è una mubilisazioni da «urganizà a rifundazioni di u muvimentu patriotticu ».
À senta issa cunfarenza c’erani Josepha Giacometti, calchì riprisintenti di Corsica Libara, di u mondu sindicali è assuciativu.
« U nosciu populu hè in traccia di sparì » : i parolli d’apartura di Jean-Philippe Antolini sò stati beddi chjari, dendu filu à u seguitu lla cumunicazioni.
« Issa sparizioni viaghja cù u spussessu tamantu di a noscia tarra », « i corsi vidini spariscia lingua è cultura soi », hà pricisatu u cullittivu.
« Ma malgradu i sforzi di u statu francesu par cundannà u nosciu populu à u sminticu, semu felici è fieri di veda spuntà una leva nova di ghjovani, chì hà cuscenza di i scumissi pulitichi, è chì hè stata capaci à mubilizà si quand’iddu ci hè vulsutu. Hè ora di rimetta issi ghjovani in cori à u ghjocu », hà dittu Jean-Philippe Antolini.
U cullittivu, cumpostu di prighjuneri è anziani prighjuneri, dici ch’iddu voli cuntinuvà u cumbattu « sfacciatu, à nomu di u intaressu cullittivu supranu di u populu corsu », è chjama dunqua u populu à iss’accolta.
« U scopu hè d’accodda i militanti di tarrenu, par fà avanzà i nosci rivindicazioni cumuni da culandi à i partiti pulitichi.
« A maiurità tarrituriali, chì hè à u puteri chì sò ottu anni, ùn hà datu à a noscia sucità i suluzioni ch’idda aspittaia. Hè ora più chè mai di mubilizà si par fà rinculà u statu francesu, da ch’iddu piddi in contu u fattu naziunali corsu ».
Si ni parlarà in l’edizioni à vena.
