Incendie de Biguglia & Olmeta di Tuda : 700 hectares ravagés, le point sur la situation
(A redazzioni d'Alta Frequenza) - Hè un focu assai viulenti chì distrughji a vegetazioni in Biguglia. In fatti, u focu partitu à un'ora menu deci in Ulmeta di Tuda hà presu prupurzioni scemi in fin di dopu meziornu par via di buffulati di ventu propiu impurtanti. Hà francatu a cresta pà falà à una vitezza assai maiò nant'à Biguglia, frà altru nant'à u paesi è lutissamenti piuttostu in piaghja com'è u lutissamentu Bevincu. À 7 ori di sera, u focu avia dighjà distruttu 700 ettari malgradu l'intarvinzioni di 150 spinghjifochi, quattru Tracker è dui Canadair. Abitanti numarosi sò stati chjamati à stassini in casa soia, ciò chì hè a cosa a più bona à fà quandu u focu s'avvicina da una casa. U focu hà francatu a strada tarrituriali 10, l'anziana strada naziunali, à u nivellu di u locu di provi di u CESR 20, una strada tarrituriali 10 chì hè tagliata ind'i dui sensi cù una deviazioni da u curdonu lagunariu di a Marana. A strada di u Lancone chì passa par Ortale è u Lancone sò dinò sarrati à a circulazioni. À u nivellu di a merria di Biguglia, a sala di i festi hè stata missa à dispusizioni pà pudè allughjà i parsoni chì n'avariani bisognu; si pò chjamà i sirvizi tennichi à u 0610087414. U focu cresci da livanti à punenti, mentri chì s'aspettani buffulati forti di ventu mentri a nuttata.
Sur le même sujet
