Football : week-end de coupe de France
(A ridazzioni d'Alta Frequenza) - Pà i squadri isulani di ballò, hè una duminicata cunsacrata à u 7esimu ghjiru lla cuppa di francia. L’AC Aiacciu andarà in Alès, à cunfruntà si à una squadra di Naziunali 3. Ci hè trè divisioni di scartu trà i dui squadri, ma da fà a soia, Olivier Pantaloni t’hà qualchì grattacapu, chì sò parichji i ghjucadori à mancà. A partita cuminciarà à sett’ori di sera. U GFCA andarà in Auch, squadra di Righjunali 1. L’omini di Hervé Della Maggiore avarani l’uccasioni di cunfirmà chivi a so bedda passata, contru à issa squadra di 6a divisioni. L’addistradori aiaccinu duvaria lacà rifiatà uni pochi di ghjucadori pà issu scontru, chì cuminciarà à sei ori di sera. In Naziunali 2, sarà più cumplicatu l’affari pà u FC Borgu-Bastia, chì hà da riceva u CS Sedan Ardennes, una squadra di stessu liveddu. U scontru cumencia à dui ori llu dopu meziornu. Infini, u SC Bastia ricivarà a squadra di u Mans (Naziunali 1), pà unu scontru chì pudaria ramintà quiddi di tandu. S’aspettani circa 8000 parsoni in Furiani, pà issa partita chì cuminciarà à ott’ori di sera.
Sur le même sujet
