Football (Ligue 2) - L'AC Ajaccio fait appel de la décision de la DNCG et se veut confiant
(A redazzioni d'Alta Frequenza) - Léon Luciani, u presidenti di l'AC Aiacciu, urganizava ssu vennari da mani una cunfarenza di stampa in u stadiu François Coty, pà riagiscia dopu a dicisioni di a DNCG di fà falà u club aiaccinu in Naziunali 1. Si ni sà di più oramai nant'à i mutivazioni di u gendarmu finanziariu di u ballò francesi, cuncirnendu a sintenza contr'à l'ACA. Una dicision sivera, chì tocca soprattuttu a forma è micca u fondu di u prublema. Hè rimpruvaratu à l'ACA un ritardu d'una suvvenzioni di 300 000 auri, chì sarà vutata da l'Assemblea di Corsica duranti a sissioni di u 29 di ghjunghju. Da un'antra banda, un ritardu custatatu inde parechji ducumenti da a parti di u Statu sò stati arrighjistrati, ma dinò ducumenti micca finalizati à u nivellu di l'azziunariatu. Léon Luciani hè à tempu prudenti ma dinò cunfidenti cuncirnendu a fini di ss'affari. Di sicuru, u club hà da fà appellu di ssa dicisioni è si prisintarà torna davanti a DNCG da quì à pocu. Sicondu u presidenti di l'ACA, i ducumenti di u Statu è quilli cuncirnendu l'intrata inde u club d'azziunari novi sò dighjà ghjunti. Ferma u votu di a suvvenzioni u 29 di ghjunghju. L'avvena di u club aiaccinu dipindarà in parti di a dicisioni presa da l'eletti duranti ssa sissioni di l'Assemblea di Corsica. Da un'antra banda, è pà francassi di qualsiasi gattiva surpresa, u club travaghja dinò nant'à a vendita di un ghjucadori. L'affari s'annunzia bè. Léon Luciani hà annunziatu dinò chì s'è u club hè integratu torna à a L2, l'ACA t'avaria un bughjettu di 10,4 millioni d'auri.
Steti à senta à Léon Luciani.
Sur le même sujet
