Football (Ligue 2) - Festival du SC Bastia à Pau (2-6)
Ùn hà avutu pietà par Pau, u SC Bastia, chì hè andatu à vincia culandi 6 à 2, pà u contu lla 36esima ghjurnata di u campiunatu di siconda divisioni.
Eppuri, Bastia incasciaia u primu marcu à a 18esima minuta, via George.
Dui minuti dopu, Santelli mittia i soi à marcu pattu, po’ Magri i facia passà davanti, dopu à 23 minuti di ghjocu.
Tocca a 27esima minuta, Placide paraia un calciu di riparu è mantinia dunqua à Bastia davanti.
Dopu à u posu, Guidi ripiddaia di capu un calciu d’angulu, pà u terzu marcu bastiacciu.
Magri à a 67esima minuta, po’ Palun di capu à a 75esima daghjiani una bedda sicurità à i Turchini.
À a 77esima, Bastia incasciaia un calciu di riparu di Bassouamina.
Infini, dopu à 85 minuti di ghjocu, Magri mittia u sestu marcu bastiacciu, u terzu par contu soiu.
Issa vittoria li faci prò à u Sporting, chì cussì si teni a so quarta piazza, malgradu a vittoria di Caen.
Sur le même sujet
