Football (Ligue 2) - AC Ajaccio devant la DNCG : 95% des objectifs atteints
(A redazzioni d'Alta Frequenza) - U presidenti di l’AC AIACCIU, Léon Luciani, dava sta mani (ghjovi) una cunfarenza di stampa fendu u puntu nant’à a situazioni di u club, chì si prisintarà marti chì veni, à 10 ori è mezu, davanti à a cumissioni d’appellu di a DNCG. Léon Luciani hà ripresu ogni puntu di a nutificazioni di u giandarmu finanziariu di u ballò. Pà ciò chì tocca à l’aiuti pà u centru di furmazioni, u dipartimentu (290.000€) è a CTC (300.000€), ani vutatu, com’è privista, i bughjetti. Sti punti sò stati arrigulati di manera chjara. U pianu Cochef hè statu vistu anch’ellu incù i servizii di u Statu. À stu nivellu quì tuttu sarà arrigulatu stu dopumeziornu. U pagamentu si pudarà fà duranti 36 mesi. Erani quì i punti i più impurtanti, riimpiuti da u club. Inveci, i 300.000€ di l’azziunarii ùn sò stati virsati nant’à u contu di l’ACA. Hè solu un ritardu ammistrativu chì si pudaria sbluccà da quì à pocu. Avà ci vò à sapè s’ella si pò fà nanzi à marti chì veni. Pà ch’ellu ùn ci fussini gattivi surpresi, Léon Luciani hà annunciatu una crescita di più di 240.000€ di u sponsoring è a vendita ‘ssi pochi ghjorni d’un ghjucadori.
Hè capita chì u club pudarà andà più serenu davanti à a DNCG, ancu s’ellu si senti parlà à l’internu, d’unipochi d’azzioni di certi squadri pà mandà l’ACA in Naziunali 1.
Steti à senta à Léon Luciani, u presidenti di l'ACA.
Sur le même sujet
