Football (Ligue 1) - L'ACA renoue avec la victoire face à Troyes (2-1)
Photo AC Aiacciu
Quissa faci prò ! Duminica, pà u contu lla 25esima ghjurnata di u campiunatu di prima divisioni, l’AC Aiacciu hà vintu contru à Troyes cù un marcu di 2 à 1.
À tempu attaccata a partita, l’aiaccini mittiani a prissioni à nantu à a cabbia di Troyes ma, com’idda hè successa troppu à spissu issa staghjoni, li mancaia a pricisioni.
Più rialista, a squadra di Troyes cunvirtia, via Baldé, a so prima uccasioni dopu à 23 minuti di ghjocu.
Dopu à quissa, ci sò vulsuti dui parati trimendi di Leroy, da ch’idd’ùn pighjurisca u marcu.
Dopu à u posu, un calciu di riparu era cuncessu à i Russi è Bianchi, ch’iddu cunvirtia Belaïli, passati 62 minuti di ghjocu.
El Idrissy daghjia a vittoria à l’AC Aiacciu à a 68esima minuta, dopu à un beddu travaddu di Belaïli è Hamouma.
In fin’di scontru, Baldé era sclusu, issendu si buscatu una siconda carta giadda pa avè missu u pedi in capu à Leroy.
Cù issa vittoria, l’ACA ricodda à a 17esima piazza, Troyes rimpiazzendu a squadra corsa à a 19esima.