Enlèvement en Haute-Corse : un homme mis en examen et placé en détention provisoire pour complicité
(A ridazzioni d'Alta Frequenza) -
Issa duminica, a prucuratrici di Bastia, Caroline Tharot, hà annunciatu a missa in asaminu è u piazzamentu in ditinzioni pruvisoria di Thomas Perreux, 34 anni, par cumplicità, ditinzioni è siquistrazioni arbitraria, ma dinò par associu di malfattori cù prughjettu di crimini, dopu à u rapimentu d’una ghjuvanetta di 23 anni di naziunalità rumena, vennari in Cismonti. U 10 d’aprili, trè ghjorna innanzi à a so ghjunta in Corsica, Thomas Perreux è Arnaud le Hébel, u rapitori, urighjinarii tramindui di i circonda di Nantes, s’ani buscu un fucili d’assaltu cù parichji cartucci. Po’, vennari u 20 d’aprili, a mani matina, Arnaud le Hébel hà rapitu a vittima in una vittura di lucazioni, mentri ch’idda lacaia u so alloghju di Lucciana cù a so cugnata, par andà a travaddà. A cugnata lla vittima, chì l’omu avia minatu, hà subbitu datu l’alerta. I invisticazioni lla ciandarmaria ani purtatu à una surviglianza lla vittura principali llu rapitori, vista in portu di Toga. Hè vicinu à issa vittura ch’idd’hè statu coltu Thomas Perreux, chì hà mintuvatu, mentri a so guardia à vista, a casa ch’idd’appighjunaiani in Porri, in Piaghja Uriintali. Hè stata missa in piazza una surviglianza lla casa, prima ch’iddi dochini l’assaltu, circa 4 ori llu dopu meziornu, i forzi spiciali lla ciandarmaria. Mentri iss’assaltu, Arnaud le Hébel, d’età 33 anni, è cundannatu deci volti - trà altri par viulenza - si hè datu a morti. A vittima hà dittu ch’idd’hè stata amanittata, strapazzata è furzata da u so rapitori. D’apressu ad idda, chì hè in Corsica chì sò sei mesa, u rapitori ùn avaria accittatu a spiccatura, dopu d’essa si fraquintati a statina scursa. Una rilazioni principiata via discursati à nantu à siti di scontru, mentri ch’idda staghjia sempri in Ruminia.
Caroline Tharot prucuratrici di Bastia
Sur le même sujet
