Dominique Colonna nous a quittés
Era u più anzianu di l’internaziunali francesi di u ballonu, è un ghjucadori corsu di i più talintosi, à torru à Claude Papi, Jean-Jean Marcialis o Etienne Sansonetti.
Di tutti issi tarcani di u ballonu corsu, hè statu iddu u più primiatu.
Dumenicu Colonna si n’hè andatu à l’eternu, à 95 anni.
Mancu ùn ci hè bisognu à prisintà lu : trè volti campion’di francia cù Reims è una volta cù Nizza, hà ghjucatu cù i famosissimi Raymond Kopa è Just Fontaine, sinu à a finali di a Cuppa d’Auropa di i Campioni in u 1959.
Dominique Colonna hà participatu à a Cuppa di u Mondu in u 1958 cù a francia, pirdindu in meza finali contru à u Brasiliu di u Rè Pelè !
In u 1985, hè sempri cù u ballonu ch’iddu si hà da fà rimarcà, vincindu 2,34 miliona di franchi, pà a prima edizioni di u Lotò Foot.
Natu in Corti, Dumenicu Colonna hà da lacà un eternu ricordu in a so cità, ma ancu in tutta a Corsica. Ben’intesa, a so mimoria firmarà viva ancu pà issi cità ind’iddu ghjucò, Nizza è Reims.
