Délégation corse à Paris : le mécontentement
(A redazzioni d'Alta Frequenza) - "Circulez, y a rien à voir !" Adupremi suventi ssa sprissioni quandu si tratta di a visita di una dilegazioni di a Corsica in Parighji. Fù torna u casu stamani (marti) in u ministeru di l'alloghju, induva Emmanuelle Cosse ricivia a raprisintazioni pulitica di l'isula a più alta. Una dilegazioni micca cumpletta, postu chì calchì prublema di cumunicazioni avaria impiditu tutti i participanti privisti di regula d'essa prisenti à ssa riunioni. Un senatori solu, Jean Jacques Panunzi, solu un associu di merri, quillu di Corsica Suprana, ma dui cunsighji dipartimintali aviani fattu u viaghju in Parighji. L'intitulatu stessu di u ministeru, quillu di l'alloghju, sottu intendi l'impurtanza di ssa visita, parchì l'ughjettu di a riunioni era ben intesu u fundariu. Un ministeru chì saria firmatu nant'à pusizioni stabiliti, vali à dì in u quadru strettu di a riunioni. Micca statutu di residenti, micca statutu fiscali, pocu affari nant'à i diritti di successioni : ùn si pò micca dì chì u cartulari fundariu, immubiliari è speculativu di l'isula avissi avanzatu assai oghji. Micca una zerga putenti dopu à ss'intrattenu, ma una scuntintezza micca troppu cuntinuta pà Gilles Simeoni, u presidenti di l'Esecutivu di Corsica. Hè a listessa scuntintezza chì hè stata cumunicata da Petru Antò Tomasi, u presidenti di u gruppu Corsica Libera di l'Assemblea di Corsica.
U stemi à senta.
