Compagnie maritime régionale corse : la réaction du STC Marins
(A redazzioni d'Alta Frequenza) - Sciaccamanati, abbracciati è ancu champagne : eccu com'ellu s'hè compiu in principiu di dopu meziornu à l'Assemblea di Corsica u dibattitu nant'à u prughjettu di cumpagnia marittima publica pà a Corsica. Ùn hè oramai più un prughjettu, parchì u muntami ritinutu, n'emi dighjà parlatu parechji volti, pighjarà effettu assai in furia. Ramintemi chì a manera di gistiscia ritinuta da a maghjurità tarrituriali hè quilla di a criazioni di dui Semop, Sucità d'Ecunumia Mista cù Uparazioni Unica : una chì devi spluttà i ligni pà i porti principali è l'altra chì urganizarà u sirviziu pà i porti sicundarii ; tuttu què sarà gistitu da una sucità d'investimentu, chì sarà in carica di cumprà è di gistiscia i battelli. Hè impurtanti di pricisà chì pà i porti principali d'Aiacciu è di Bastia, u capitali di a Semop sarà à maghjurità privatu, è sarà u cuntrariu pà i porti sicundarii, induva i capitali publichi sarani quì maghjuritarii. U STC, si sà, è dipoi un pezzu, n'hà fattu assai in u sensu ch'ellu hà presu oghji u cartulari. U bichjeru di champagne ùn era micca di troppu è và propiu aldilà di l'inchietudini di quilli chì sò contr'à u prughjettu.
Steti à senta à Alanu Mosconi, u secretariu naziunali di u STC Marinari.
