Budget primitif 2016 de la CTC : Paul Giacobbi réagit à la nouvelle offre de l'Exécutif
(A redazzioni d'Alta Frequenza) - Un'ufferta nova ! Eccu ciò ch'elli ani prupostu stamani (vennari) l'Esecutivu di Corsica è a maghjurità tarrituriali à l'uccasioni di u votu di u bughjettu primitivu pà l'annata 2016. Com'è u dibattitu inghjiru à ss'eserciziu bughjettariu s'hè guasgi cuncintratu nant'à un puntu solu, u debbitu di a mandatura scorsa, a discursata di stamani hè stata guasgi solu nant'à ssu puntu di primura. Ramintemi chì pà sguassà ssu debbitu è pà prisintà un bughjettu in equilibriu è in rilazioni cù una visioni pulitica cuerenti, l'Esecutivu di Corsica hà prupostu di passà pà un imprestitu di 157 millioni d'auri. Una situazioni impussibuli ad accittà pà i sfarenti uppusizioni chì dumandani una revisioni, una calata assai forti, di ss'imprestitu chì t'avaria cunsiquenzi forti nant'à l'esercizi bughjettarii chì venini. A pruposta fatta stamani da l'Esecutivu di Corsica si riassumi infini à taglià u fruttu in dui parti. In fatti, ssi 157 millioni d'auri d'imprestitu firmariani bè scritti in u bughjettu primitivu 2016, ma cù guasgi a mità validata duranti u votu di u bughjettu supplementariu. Paul Giacobbi hà trovu chì certi pruposti fatti stamani da Gilles Simeoni erani intarissanti. Eppuru, d'appressu à ellu, a suluzioni missa in avanti s'assumiglia di più à bluff è micca à una vera suluzioni pulitica.
Steti à senta à Paul Giacobbi.
