Arrêtés Miot et décision du Conseil constitutionnel : les propositions de Jean Zuccarelli
(A redazzioni d'Alta Frequenza) - "Socu assai surpresu da a dicisioni di u Cunsighju custituziunali chì caccia a prulungazioni di u dispusitivu dirugatoriu di l'arrestu Miot. Mentri chì a mudificazioni posta da u diputatu Paul Giacobbi prulunghendu pà cinqui anni issu regimi era stata accurdata da i parlementarii è scritta ind'a legi di Finanzi pà u 2013, i "savii" ani presu una pusizioni chì inghjinnarà cunsiquenzi maiò pà i nostri citadini" dici Jean Zuccarelli ind'un cumunicatu. Pà u presidenti di l'ADEC "issa dicisioni si capiscia ancu di menu ch'ella tocca un dispusitivu transitoriu". "Ma aldilà di l'emuzioni legetima di l'insemi di a pupulazioni corsa, inghjinnata da issa dicisioni à l'asseccu", cuntinueghja l'elettu, "ci voli à circà subbitu subbitu i suluzioni i più adattati pà sguassà u più in furia l'effetti di una situazioni simuli. Ind'un cuntestu d'urghjenza, a suluzioni ghjuridica a più benvinuta hè, di modu evidenti, di scriva una nova virsioni di "a mudificazioni Giacobbi" ind'u prughjettu di legi di Finanzi à cambià chì u Guvernu duvarà prisintà à u Parlamentu". Jean Zuccarelli chì ferma dinò "cunvintu chì ci voli à andà più luntanu è scriva l'insemi di i dispusitivi dirugatorii isulani (creditu d'impositu, fiscalità successurali, FIP, TVA, ecc...) ind'un quadru più largu chì accumpagna a voghja di u Guvernu d'arricà à a Corsica tutti l'arnesi di u so sviluppu".
